ავტორი: მეგი კობალაძე
პროექტი სახელწოდებით 'მეც ლამაზი ვარ' არის ერთგვარი ბრძოლა იმ სილამაზის სტანდარტების წინააღმდეგ, რასაც დღევანდელი ტენდენცია გვთავაზობს. ჩვენი მიზანია დავამსხვრიოთ სტერეოტიპული წარმოდგენები სილამაზის შესახებ. ჩვენი მიზანია გავაპროტესტოთ ბულინგი, რომლის მსხვერპლიც ბევრი ჩვენგანი აღმოჩენილა გარკვეულ სიტუაციაში. გავაზიაროთ საკუთარი ისტორია, თავისი მტკივნეული გარდამტეხი ეპიზოდებით. ჩვენი მიზანია დავანახოთ საზოგადოებას რომ ჩვენი სხეული არის ისტორიის ნაწილი, რომელიც იმსახურებს პატივისცემას და რომ ისიც ლამაზია.
„ ერთხელ ფილმში გადამიღეს. პატარა ვიყავი, მაგრამ უკვე ქმარს ვშორდებოდი. რთული პერიოდი მქონდა.
ხოდა ამ ფილმში იყო ერთი სცენა,სადაც სულ მთლიანად ვშიშვლდებოდი და სარკეში ვუყურებდი თავს. მნიშვნელოვანი სცენა იყო პერსონაჟის განვითარებისთვის. მნიშვნელოვანი სცენა გამოდგა ჩემი განვითრებისთვისაც..
ნელა და მშვიდად გავიხადე ყველაფერი, თმის რეზინიც კი მოვიხსენი,თავი ავწიე და შევხედე საკუთარ თავს. შევხედე და პირველად დავინახე ჩემი თავი. სხვა პერსონაჟის თვალით დანახული ობიექტური მე. სახე, ლოყა, ტანი, ძუძუ, სტრია, ცელულიტი, ოდესღაც ლამაზი სხეულის ნარჩენები, მთელი ჩემი ისტორია, როგორ მეტყობოდა ჩემი სხეულის ყოველ სანტიმეტრზე, ყველა კარგი და ყველა ცუდი ისტორიის მთხრობელი ჩემი სხეული, დავინახე პირველად. მიყვებოდა რომ დედა ვარ, ქალი ვარ, სექსუალური, შვილი მყავს, ქმარი მყავს და მალე აღარ მეყოლება, სექსუალური ცხოვრების არევა, ღამე ჭამა, ტკბილის სიყვარული, ალკოჰოლის სიყვარული, უშნოდ მოჭრილი თმა, შეშუპებული ქუთუთოები, შეშუპებული ბარძაყები, წელი, მუცელი…“
