A True Story - ნონა ოთარაშვილის (კერამიკა) და სოფო ტაბატაძის (გრაფიკა) ერთობლივი კერამიკული პროექტია. სოფომ და ნონამ ერთად მუშაობა 2009 წელს დაიწყეს. მათი მიზანი იყო ნონას კერამიკული და სოფოს გრაფიკული გამოცდილების გაერთიანება. ორივე მხატვრისთვის საინტერესო მუშაობის პროცესში მათ მიაგნეს ახალ ვიზუალურ ენას. შედეგად შეიქმნა ნამუშევრების სერია “A true story”. ეს არის კერამიკულ ობიექტებზე გადატანილი გრაფიკული ნახატები.
თავდაპირველად ეს ნახატები იქმნებოდა პატარ-პატარა ფურცლებზე სხვადასხვა სიტუაციებში. მაგალითად, შეხვედრების, ვორკშოპებისა და სემინარების დროს. წარმოიდგინეთ სატელეფონო საუბრისას გაუცნობიერებლად კალმით ფურცელზე ხატვა. ამ დროს არ კონტროლდება არც კომპოზიცია, არც ხაზი და არც შინაარსი, ნახატები თითქოს ქვეცნობიერად იქმნება. ამ დროს მხატვარი არ ფიქრობს ნახატზე როგორც პროდუქტზე და ხატვის დროს თავისუფალი თამაშის ელემენტი მაქსიმალურად ნარჩუნდება. შედეგი არ არის დამოუკიდებელი ნამუშევარი, როგორიც იქნებოდა მაგალითად ქაღალდზე ან ტილოზე შესრულებული ნახატი. ეს არის ბლოკნოტიდან, რვეულიდან და ფურცლებიდან ამორჩეული და დასკანერებული ფიგურების კომბინაციები, რომლებიც შეიძლება სხვადასხვა მასალას მოერგოს.
ამ სერიაში გამოყენებულია და ერთმანეთს უპირისპირდება ფაიფური და შავი თიხა. ამ ორ, თითქოს რთულად ურთიერთთავსებად მასალას ერთმანეთთან მკვეთრი გრაფიკული ხაზი კრავს და მოულოდნელ სახეს აძლევს.
ეს სერია შედგება პატარა ფაიფურის ფირფიტებისგან, დიდი თიხის თეფშებისგან, საჭრელი დაფებისა და ცილინდრული ფორმის ლარნაკებისგან. მხატვრულ ღირებულებასთან ერთად ნივთების ნაწილს აქვს გამოყენებითი ფუნქციაც.
